Монголын Үндэсний Музей

Өнөөдөр нэмэгдсэн мэдээ

“Монголын музейд хадгалагдаж байгаа зарим үзмэр эд өлгийн зүйлсийг судлан олны хүртээл болгосон бүтээлүүд

/1990-2010 он/” сэдэвт үзэсгэлэн худалдаа 09 сарын 3- 10 өдрүүдэд МҮМ-д болно.

Монголын музейнүүдэд хадгалагдаж буй ховор нандин үзмэр, цуглуулгыг эрдэм шинжилгээний эргэлтэнд оруулж сүүлийн 10 жилд хэвлэн нийтэлсэн бүтээлийг тус үзсгэлэн худалдаагаар олон нийтэд дэлгэн үзүүлэх юм. Гадаад дотоодын олон эрдэмтэн мэргэдийн бүтээл туурвилд манай музейнүүдийн сан хөмрөгт буй цуглуулгуудыг эх хэрэглэгдэхүүн болгосон нь музей эрдэм шинжилгээ, судалгааны нэгэн томоохон эх сурвалж болохыг бэлхэнээ нотлон харуулдаг юм. Энэ үйл ажиллагаа нь судлаачид оюутан залуус, үзэгчдийг холбосон сонирхолтой ажил болох төдийгүй ирээдүйд музейн сан хөмрөгийн судалгааны цар хүрээг тэлэх, төлөвлөгөө, цар хүрээг өргөсгөх боломжийг хайх хэлбэрийг уламжлал болгон зохион байгуулахаар төлөвлөж байна.

“Монголын музейн сан хөмрөгт хадгалагдаж буй зарим үзмэр, эд өлгийн зүйлсийг судлан олны хүртээл болгосон бүтээлүүд /1990-2010/” сэдэвт үзэсгэлэн худалдааг 2010 оны 9 дүгээр сарын 03-наас 10-ны өдрүүдэд Монголын Үндэсний музейн үзэсгэлэнгийн танхимд зохион байгуулна. Эрхэм багш, судлаач, эрдэмтэд, оюутнууд та бүхнийг үзэсгэлэн худалдаанд морилон ирж хүссэн хайсан ном бүтээлээ хаа ч байхгүй хямд үнээр худалдан авахыг санал болгож байна.

Хичээлийн шинэ жилийн мэнд дэвшүүлье.

Манай сайтын боловсрол, танин мэдэхүйн үйл ажиллагаатай танилцан, зочилж байдаг эрхэм оюутан залуус, сурагч багачууд, багш нартаа 2010 оны хичээлийн шинэ жилийн мэнд хүргэе. Энэ хичээлийн бид музейн боловсролын ажлаа өргөтгөн ардын уламжлалт гар урлалын сургалт, хүүхдэд зориулсан танин мэдэхүйн идэвхтэй үйл ажиллагаа зэрэг олон хөтөлбөрийг хийхээр төлөвлөөд байна.

2010 оны хичээлийн жилд бид "Монголын амьд түүх, 8, 9-р ангийн түүхийн хичээлийн хөтөлбөр, Баатрууд бага ангийн сурагчдад зориулсан хөтөлбөр, Гэр бүлийн хөтөлбөр, Оюутнуудад зориулсан 50 хувийн хөнгөлөлттэй тайлбарт аялалын хөтөлбөр нээлттэй байгаа болно. Та бүхэн бидэнтэй хамтран ажиллаарай.

Дээрх хөтөлбөрүүдэд хамрагдах хүсэлтээ бидэнд This e-mail address is being protected from spambots. You need JavaScript enabled to view it хаягаар ирүүлэх буюу музейн 2-р давхарт байрлах манай оффист ирж манай ажилтнуудтай биечлэн уулзахыг урьж байна.

МҮМ-н Олон Нийтийн алба

МҮМ Маркетингийн ажилтан шалгаруулж авна.

Тавигдах шаардлага:

Маркетингийн баклавар болон түүнээс дээш зэрэгтэй. Энэ чиглэлээр ажиллаж байсан туршлагатай, комьпютер, гадаад хэлний мэдлэгтэй, багаар ажиллах чадвартай ажилтныг шалгаруулан авна.

Бүрдүүлэх материал:

Төрийн албан хаагчийн Маягт №1 анкет
Дипломийн баталгаат хуулбар

Материалаа УБ-46, ШХ-332 Монголын Үндэсний Музей хаягаар болон МҮМ-д офисст 2010 оны 09-р сарын 20 дотор ирүүлнэ үү.

МҮМ-н захиргаа

Шинэ каталог

МОНГОЛЫН ҮНДЭСНИЙ МУЗЕЙ

Каталогийн тухай товчхон:

Энэхүү каталог нь МҮМ-н үндсэн каталог бөгөөд байнгын үзэсгэлэнгийн танхимуудын дагуу үзмэр үзүүллэгээ тайлбарлан бичиж, олон улсын жишгээр хэвлэн нийтэлсэн анхны бүтээл юм. Тус каталог нь Монголын түүхийн бүхий л үеийг хамарсан ба Монгол орны түүх, соёлыг сонирхон судлагч нарт мэдээлэл өгөх баялаг агуулгатай. Тухайлбал, каталогийн бүлэг тус бүрд холбоотой судалгаа шинжилгээний эх сурвалж, судалгааны гар зураг болон музейн гэрэл зургийн сан хөмрөгийн түүхэн гэрэл зураг, уран зураг зэрэг олон хэрэглэгдэхүүнээр баяжуулсан байна.

Музейн цуглуулга болон байнгын үзэсгэлэнгийн 10 танхимын шилдэг үзмэрүүдийг өнгөт зураг бүхий мөн тэдгээрийн мэдээлэлийг монгол, англи хэлээр бичжээ. Музейн танхимуудын танилцуулга, түүхэн үеүүдэд холбогдох ховор сонин үзмэрүүдийг сонгон оруулсан тус каталог нь 10 бүлэгтэй, А4 (290 х 21) хэмжээ бүхий 216 хуудас өнгөт каталог болно. Каталогт 100 гаруй түүхэн гэрэл зураг, 500 орчим үзмэрийн гэрэл зураг холбогдох тайлбар багтжээ.

Музейн эрдэм шинжилгээний ажилтан нар бүлэг бүрийг нь бичсэн байна.

1. Нэн эртний Монгол - Ж.Баярсайхан
Монгол нутаг дахь эртний улсууд – Ц.Одбаатар
Монгoлын эзэнт гүрэн – Ц.Оюунхишиг
Монголын үндэсний хувцас, гоёл чимэглэл – Л.Энхтуяа, Н.Нарангэрэл
Монголын уламжлал соёл –Ц.Оюунхишиг, Ч.Туулцэцэг
Монголын уламжлалт аж ахуй –Л.Энхтуяа, М.Цэрмаа
XVII-XX зууны Монгол орон – Б.Баасанжаргал
Монгол улс 1911-1920 он – Д.Бумаа Доктор
Социализмын үеийн Монгол орон - Д.Бумаа Доктор
Ардчилсан Монгол орон – Д.Бумаа Док, Ц.Эгиймаа

Эрхлэн гаргагч: Монгоын Үндэсний музей
Редактор: Ж.Саруулбуян До, Проф, Г.Эрэгзэн Док, Ж.Баярсайхан Магистр
Орчуулагч: Г.Дэмбэрэлдорж, Хуролд Улрике
Гэрэл зураг: Неруд Мишель, Ж.Баярсайхан, Л.Энхтуяа, Б.Эрдэнэсайхан, Ж.Октябрь
Эх бэлтгэл: Б.Эрдэнэсайхан, Ш.Эрдэнэцэцэг

2010 онд Улаанбаатар принт компанид хэвлэжээ.

Музейн сан хөмрөг дэхь цуглуулгаар олон нийтэд толилуулах түр үзэсгэлэн:

1. “МОНГОЛ ЭМЭГТЭЙ УРАН ҮЙЛ” ( 2010 оны 10-р сарын 10-19. МҮМ)

Монгол угсаатны хувцас, гоёл чимэглэл нь тус орны байгаль цаг уурын нөхцөл, эрхэлдэг аж ахуй, хэвшиж дадсан заншил төдийгүй түүхэн цаг үеийн онцлог, нийгмийн байдлыг тов тодорхой тусгаж ирсэн эдийн соёлын чухал дурсгал юм. Үүнтэй холбогдуулан тус музейн сан хөмрөгт хадгалагдаж буй монгол, түрэг, хамниган угсааны 20 гаруй угсаатан ястны хувцас, түүнийг хийх арга технологи, багаж хэрэгсэл зэрэг монгол эмэгтэйн уран үйл, онцлогийг харуулсан ховор үзмэрүүдийг олон нийтэд таниулах, сурталчилах зорилгоор энэхүү үзэсгэлэнг нээх юм. Энэ үзэсгэлэнд монгол эмэгтэйчүүдийн урласан дээл хувцсыг халх, буриад, захчин, үзэмчин гэх мэт ястны эрэгтэй, эмэгтэй хүний өвөл, зуны хувцас, даалин, аяганы уут, хавтага зэрэг үзмэрүүдээр төлөөлүүлэн үзүүлэх бөгөөд улс төр, нийгмийн томоохон зүтгэлтнүүдийг хэрэглэж байсан хувцас, эд өлгийг дэлгэн үзүүлэх болно.

1. ШИНЭ ОЛДВОР ТУСГАЙ ҮЗЭСГЭЛЭН: 2010 оны X сарын 20-31

Энэхүү үзэсгэлэн нь сүүлийн 3 жилд Монголын Үндэсний Музейгээс дотоод, гадаадын байгууллагуудтай хамтран хэрэгжүүлсэн хээрийн судалгааны төслийн үр дүнд олж илрүүлсэн шинэ олдворууд болон шинээр худалдан авсан үзмэрүүдийн дээжээс бүрдэнэ.

2. МОНГОЛЫН ОРЧИН ҮЕИЙН ЗУРАГТ ХУУДАС: 2010 оны XII сар

Орчин үеийн монголын түүхийг илэрхийлэх нэгэн сонирхолтой эх сурвалж нь зурагт хуудас билээ. Музейн сан хөмрөгт хадгалагдаж буй зурагт хуудсын цуглуулгаар тусгай үзэсгэлэн зохион байгуулж олон нийтэд толилуулахаар бэлтгэж байна.

3. ТАМГА, ТУГ, ДАЛБАА: 2010 оны XII cарын 29 –

Музейн сан хөмрөгт хадгалагдаж буй тамга, туг, далбааны цуглуулгыг тусгай үзэсгэлэнгийн хэлбэрээр олон нийтэд толилуулах юм. Монголын төрийн түүхийн бэлгэдлийн зүйлс тэдгээрийн уламжлал, шинэчлэл түүхэн ач холбогдолыг нээн гаргах зорилготой юм. Энэхүү үзэсгэлэн нь хоёр оны зааг дээр зохион байгуулагдах бөгөөд 2011 онд тохиох Богд хаант Монгол улсын 100 жилийн ойд зориулсан тусгай ажлын нэг болох юм.

1. “МУЗЕЙН МЭДЭЭЛЭЛ”

МҮМ-н мэргэжил, арга зүй, мэдээллийн сэтгүүл - 2010. V Сар №03 ISBN: 978-99929-1-499-8

Олон улсын музейн өдрөөр хэвлэгдэн олны хүртээл болсон сэтгүүлийн энэ удаагийн дугаар нь музейн ажилтнуудад зориулсан мэдээлэл, тухайлбал Ажил үүргийн тодорхойлолт, Угсаатны үзүүллэг дэглэлтийн талаарх зөвлөмж, Олон Улсын Музейн Зөвлөл, Монголын Үндэсний хорооны дарга Д.Цэдмаатай хийсэн ярилцлага болон бусад олон төрлийн мэдээ, мэдээллийг багтаасан юм. Мөн энэ дугаарт монголынхоо музейдыг таниулах сурталчилах зорилгоор “Музейтэй танилцана уу” буланг нээж “Чингис хааны өв соёл” хувийн музейн тухай болон шинээр нээхээр төлөвлөж буй “Ээж музей” тухай ярилцлагыг багтаажээ. Мөн энэ дугаарт “Цонх”, “Амрах агшин” хэмээх шнэ булангуудыг нээж тогтмол хөтөлж байх юм. “Цонх” булангаар соёл, урлагийн байгууллага, ажилтнуудын чадавхийг дээшлүүлж, дэмжлэг үзүүлдэг гадаад, дотоодын сангуудын хөтөлбөр, музей судлалын мэргэжлийн сургуулиудын талаарх мэдээллийг хүргэх ажээ.